Ўзбекистонда Унни бойитиш Миллий дастури амалга оширилаётганлиги халқаро миқёсда эътироф этилди

Куала-Лумпур, Малайзия. Унни бойитиш бўйича халқаро ташаббуснинг (Flour Fortification Initiative) Ижроия қўмитаси Овқатланиш бўича Халқаро ACEAН конференцияси доирасида бўлиб ўтган Унни бойитиш бўйича Биринчи Минтақавий Семинарда Унни бойитиш Миллий дастурини амалга оширишга қўшаётган ҳиссаси учун Ўзбекистон делегациясини фахрли халқаро мукофот билан тақдирлади.

«Унни бойитишдаги пешқадамлиги учун» деб номланган ушбу мукофот билан Унни бойитиш бўйича Халқаро ташаббуснинг глобал мақсадига эришишга – 2008 йилга келиб жаҳонда ишлаб чиқарилаётган уннинг 70 фоизини темир ва фолий кислота билан бойитишга салмоқли ҳисса қўшган ун корхоналари тақдирланадилар.

Ўзбекистонда Унни бойитиш Миллий дастури доирасида деярли икки йил ичида 900 минг тоннадан зиёд буғдой унини бойтишга эришилди.

Бугунги кунда «Ўздонмаҳсулот» АК га қарашли 44 та корхонанинг ҳар бирида биринчи навли бойитилган ун ишлаб чиқарилмоқда. Яна 13 та йирик ун корхоналари фортификация асбоб-ускуналари билан қўшимча жиҳозланган бўлиб, бу ҳар йили 1 миллион тоннадан зиёд бойитилган ун ишлаб чиқаришга имкон беради.

Унни бойитиш бўйича Халқаро ташаббуснинг пресс-релизида шундай дейилади: Унни бойитиш бўйича Миллий дастурни муваффақиятли амалга оширишнинг энг муҳим омилларидан бири дастурнинг давлат томонидан энг юқори даражада қўллаб-қувватланиши, витаминлар сотиб олиш учун айланма фонднинг ташкил қилиниши (бу дастурнинг барқарорлигини таъминлайди) ҳамда бойитилган ун ишлаб чиқариш бўйича давлат стандартларининг қабул қилиниши бўлди.

Дастурни амалга оширишнинг якуний босқичида қаердан олиб келинишидан қатъи назар, Ўзбекистон бозорига чиқарилаётган барча ун ва ун маҳсулотларининг барқарор бойитилиб боришини таъминловчи қонуний ҳужжатларнинг қабул қилиши кўзда тутилмоқда.